ტკივილის მართვის დეპარტამენტი
დეპარტამენტის ხელმძღვანელი - ნიკოლოზ რთველიაშვილი
ტკივილის მართვის დეპარტამენტში შესაძლებელია ნებისმიერი ტკივილი კომპლექსურად იყოს შესწავლილი და ჩატარდეს მკურნალობა რაც გულისხმობს მისი ძირითადი გამომწვევი მიზეზის აღმოჩენას, ლიკვიდაციას, სისტემურ მედიკამენტურ თერაპიას, მცირე ინვაზიური პროცედურების ჩატარებას ან/და ქირურგიას.
მიმართე თოდუას კლინიკის ტკივილის მართვის დეპარტამენტს თუ:
- გაქვს ნებისმიერი სახის ტკივილი რომლის წარმოშობაც მრავალი კვლევის მიუხედავად დაუდგენელია
- ძირითადი დაავადების მკურნალობის მიუხედავად რჩება შემაწუხებელი ტკივილი რომელიც მნიშვნელოვნად აქვეითებს ცხოვრების ხარისხს
- გაქვს ოპერაციის შემდგომი ნებისმიერი ტკივილი მაშინ როდესაც ოპერაციული მკურნალობა წარმატებითაა ჩატარებული და აღარ საჭიროებს განმეორებით ოპერაციას ან შეუძლებელია განმეორებითი ოპერაციის წარმოება
- თუ საჭიროა ტკივილის გამომწვევი მიზეზის დიფერენცირება სადიაგნოსტიკო პროცედურის გამოყენებით
- თუ გაქვს ონკოლოგიური პათოლოგიით გამოწვეული ტკივილი და შესაბამისი პროტოკოლით მართვის მიუხედავად ტკივილი მაინც შემაწუხებელია.
თუ გაწუხებს:
- კისრის ტკივილი
- ზურგის, ბეჭების, გულმკერდის ტკივილი
- წელის ტკივილი
- გავისა და კუდუსუნის ტკივილი
- სახსრების ტკივილი
- ონკოლოგიური პათოლოგიით გამოწვეული ტკივილი
- თავის ტკივილი, სკალპის ტკივილი
- ჰერპესული ინფექციის შემდგომი ან სხვა ნეიროპათიული ტკივილი
- კომპლექსური რეგიონული ტკივილის სინდრომი, კიდურების ვეგეტატიური ტკივილი როდესაც გამორიცხულია სისხლძარღვთა მაობლიტირებელი პათოლოგიები
- კიდურის ამპუტაციის შემდგომი ფანტომური ტკივილი
- ნებისმიერი სხვა არადიფერენცირებული ტკივილი
გახსოვდეთ, ქრონიკული ტკივილის მართვა მულტიდისციპლინური დარგია და მასში მონაწილეობას ღებულობს მრავალი დარგის ექიმი:
- ფსიქიატრი, ფსიქოლოგი, მენტალური დარღვევების სპეციალისტი
- ნევროლოგი
- ნეიროქირურგი
- რევმატოლოგი
- ტრავმატოლოგ-ორთოპედი
- ონკოლოგი
- სხვადასხვა სპეციალიზაციის რადიოლოგი და ფუნქციური დიაგნოსტიკის სპეციალისტი
- ანესთეზიოლოგი და სხვა
ტკივილის მართვა მოიცავს:
- სისტემურ მკურნალობას ტაბლეტირებული მედიკამენტებით ან ინექციებით
- სისტემურ მკურნალობას სპეციალური მედიკამენტების ინფუზიით რომელიც ხორციელდება კლინიკაში
- მცირე ინვაზიურ პროცედურებს (ე. წ. ბლოკადებს, რადიოსიხშირულ აბლაციასა და ნეირომოდულაციას, კრიოთერაპიას, ნეიროსტიმულაციას)
- საჭიროების შემთხვევაში, ერთობლივი გასინჯვისა და/ან კონსილიუმის გადაწყვეტილების შესაბამისად ოპერაციულ მკურნალობას
- რთული და მულტიფოკალური ტკივილის შემთხვევაში სპინალური საინექციო პორტის იმპლანტაციას და „გამაყუჩებლის“ სპინალურ არხში მუდმივ ინფუზიას სპეციალური აპარატის საშუალებით
- გახანგრძლივებულ ნეიროსტიმულაციას სპეციალური იმპლანტირებადი ელექტროდის საშუალებით.